Тез жардамды кантип чакыруу керек?
Кыргызстан боюнча тез жардам кызматы каалаган байланыш телефондордон, стационардык же мобилдик телефондордон 103 номуру аркылуу чакыруу каралган. Ошондой эле бирдиктүү тез жардам – 112 номери бар, ал чалууларды бардык ыкчам жардам кызматтарына жөнөтөт.
«Тез жардамды чакырып жатканда сиздин так жана туура маалымат беришиңиз абдан маанилүү. Биринчи кезекте - окуя болгон жер же бейтаптын учурдагы жайгашкан дареги зарыл. Ал толук жана так болушу керек: көчөсү, үй номери, батир, подъезд, кабаты. Эгерде чалуу көчөдө болсо, жакын жердеги болжолдуу жерди көрсөтүү керектелет», — дейт Болот Абдылдаев.
Ошондой эле бейтап жөнүндө маалымат так берүү керек: эгер сизге белгилүү болсо - фамилиясы, болжолдуу жашы. Ошондой эле өзүңүздүн маалыматыңызды берүүнү унутпаңыз: аты жөнүңүздү, бейтаптын кимиси болооруңузду жана кайра байланыш үчүн телефон номериңизди калтырыңыз. Мындан тышкары тез жардамды кечиктирүүчү катачылыктардан оолак болуу да маанилүү.
«Негизги ката – тынчсызданып өзүн-өзү жоготуу, мындай учурда адам маалыматты так жеткире албай калат. Дагы бир кеңири жайылган көйгөй – чалууда даректи так эмес көрсөтүү, бул тез жардам бригадасынын келүү убактысын создуктурат. Көбүнчө чалгандар эмне болгонун так сүрөттөп бере алышпайт, ошондуктан тийиштүү бригаданы тандоо кыйынчылык жаратат», - деп белгиледи адис.
Чалуудан кийин эмне кылуу керек?
Чакыруу жасалгандан кийин ал телефонду өчүрбөңүз – анткени диспетчер окуянын чоо-жайын тактап чалып калышы мүмкүн. Тез жардам бригадасынын бейтапка тоскоолдуксуз кирип келишин камсыз кылыңыз: дарбазаны, каалганы, эшикти ачыңыз. Зарыл учурда, кандай аракет кылыш керек экендигин билсеңиз, бейтапка биринчи жардам көрсөтүңүз. Дарыгерлердин келишин күтүңүз.
