Жашоо Медиа: “Эгерде кене, жылан чакса, же ит тиштесе эмне кылуу керек?”

Уулуу жыландар Кыргызстанда сейрек кездешет, бирок алардын чагып алуу тобокелдиги бар. Эгерде жылан чагып алган болсо төмөнкүдөй аракеттерди кылуу зарыл:

1-кадам. Жараатты таӊганга жана кескенге болбойт.

2-кадам. Жарааттын ордун аккан суу менен жуугула, жарааттын айланасын акырындык менен ортосун көздөй ныгырып, ууну кылдаттык сыгып чыгарганга аракет кылгыла.

3-кадам. Токтоосуз түрдө дарыгерге кайрылгыла, себеби ууга каршы каражат (антидот) саюу керек болуп калышы мүмкүн.

Кене чагуу бир кыйла кеӊири таралган жана коркунучтуу көрүнүш. Кан соргуч курт-кумурскалар кене энцефалити сыяктуу кооптуу ооруларды алып жүрүшү мүмкүн.

1-кадам. Кенени чыгаруу үчүн жипти колдонгула: жипти кененин башына орогула жана сааттын жебесине каршы тарапка бурап кылдат тартып чыгаргыла.

2-кадам. Кенени чыгаргандан кийин аны айнек идишке салгыла жана жакынкы мамлекеттик санитардык-эпидемиологиялык көзөмөл борборуна анализге алып баргыла.

3-кадам. Инфекциянын алдын алыш үчүн дарыгерге кайрылгыла.

Ит тиштеген учурлар абдан көп кездешет. Адамдар көбүнчө бакма жана жолбун иттердин азуусунан жабыркайт. Унутпагыла, атүгүл ит канчалык дени сак көрүнсө дагы жараатты иштетүү керек.

1-кадам. Ит тиштеген жараатты аккан суу менен жуугула жана стерилдүү таӊуу койгула.

2-кадам. Селеймеге жана кутурмага каршы эмдөө алуу үчүн токтоосуз түрдө дарыгерге кайрылгыла, айрыкча тиштеген иттин эмдөөсү болбосо же жолбун ит болсо өтө кооптуу.